Төшләремә кермә буран булып,
Күңелемдә ярсып дулама!
Төшләремдә мин тик кар бөртеге,
Син мине очыртып уйнама.

Төшләремә кермә гөләп булып,
Мин бәләкәй моңлы сандугач.
Ботагыңа кунып җырлар идем - 
Очлы энәләрең кадый ич!

Төшләремә болыт булып кермә!
Мин - Якты Кояшны - каплама.
Көлмә, зинһар! Мин ялварып сорыйм:
Саф - пакь хисләремне таплама!

Төшләремә кермә үзең булып...
Төшләремдә мине каргама!
... Кемнәр безне шулай аерды соң?
Җилләр үтте микән арадан?

Кермә төшләремә......

25.01.2003 ел